Seuli hap ekspozitën e parë afatgjatë kushtuar artit islam në bashkëpunim me Muzeun e Artit Islam në Doha
Edhe pse Islami mbetet ende pak i njohur për shumë koreanë, prania e kulturës islame në Korenë e Jugut po rritet ndjeshëm. Nga rreth 2 milionë shtetas të huaj që jetojnë në vend, rreth 300 mijë përllogariten të jenë muslimanë.
Në këtë kontekst të ri kulturor, Muzeu Kombëtar i Koresë (NMK) ka hapur në seksionin “World Art” ekspozitën e parë afatgjatë të dedikuar artit islam. Ekspozita, e cila do të qëndrojë e hapur nga kjo e shtunë deri më 11 tetor 2026, titullohet “Islamic Art: A Journey of Splendor”.
83 vepra nga Muzeu i Artit Islam në Doha
Të gjitha 83 veprat në ekspozitë vijnë nga koleksioni i pasur i Museum of Islamic Art (MIA) në Doha, Katar. Afati 11-mujor i shfaqjes pasqyron rregullin e Katarit që lejon huadhënie të objekteve kulturore jashtë vendit për më pak se një vit.
Kuratorja e ekspozitës, Kwon Hye-eun, theksoi se qëllimi kryesor ka qenë ta bëjë kulturën islame më të kuptueshme për publikun korean, për të cilin shpesh ajo mbetet e panjohur.
Arkitekturë e frymëzuar nga xhamitë dhe estetika islame
Galeri e ekspozitës është projektuar në formë tetëkëndore, duke evokuar atmosferën e një xhamie. Dekorimet me motive gjeometrike dhe mungesa e figurave njerëzore e shtazore i qëndrojnë besnike traditës islame, ku arti përqendrohet te kaligrafia, drita, simetria dhe zbukurimi ornamental.
Objekti hyrës është një “Folio nga një Kuran Monumental”, i konsideruar një ndër dorëshkrimet më të mëdha të mbijetuara, i porositur nga Timuri, themelues i dinastisë Timurid.
Nga Medina dhe Qabja te qilimat Safavidë
Ndër objektet e spikatura është dorëshkrimi i shek. XIX i Dala’il al-Khayrat, që përmban ilustrime të Medinës dhe Mekës me Qaben.
Një vepër tjetër e veçantë është “Qilimi i Fronit” i shekullit XVII, një kryevepër e epokës Safavide, mbi 250 cm i gjatë, e cila besohet se ka qenë e destinuar për një sallë fronësh.
Gjithashtu ekspozohen fletë të ilustruara nga Shahnama (Libri i Mbretërve) i porositur nga Shah Tahmasp I, i famshëm për ngjyrat dhe detajet e tij të jashtëzakonshme. Disa prej dorëshkrimeve do të rotacionohen për arsye konservimi.
“Dhoma e Damaskut” dhe një përvojë e gjallë historike
Në pjesën fundore të galerisë, vizitorët mund të shohin një rindërtim të dhomës së pritjes së një familjeje fisnike osmane në Damask, një nga ambientet ikonike të MIA.
Katar–Kore: Një partneritet i ri kulturor
Muzeu i Artit Islam në Doha, i themeluar në vitin 2008 dhe pjesë e Qatar Museums, mban rreth 100,000 objekte, nga të cilat 800 janë të ekspozuara. Ndërtesa e tij është vepër e arkitektit të famshëm I. M. Pei, autori i Piramidës së Luvrit.
Drejtoresha e MIA, Shaikha Nasser Al-Nassr, deklaroi se bashkëpunimi me Korenë përbën fillimin e një partneriteti të rëndësishëm afatgjatë. Ajo vuri në dukje se kultura koreane është shumë e ndjekur në Katar – nga drama koreane te performanca e BTS në Kupën e Botës 2022.
Zëvendësdrejtoresha Dr. Mounia Chekhab Abudaya theksoi se ekspozita kërkon të thyejë stereotipet dhe perceptimet negative të krijuara gjatë dekadave rreth Islamit dhe rolit të gruas në shoqëritë myslimane.
Ajo shtoi se ekspozita e ardhshme në Doha do të jetë e fokusuar në Afganistan, duke përfshirë një seksion të dedikuar fotografeve femra — një dëshmi e zërave të fuqishëm të grave në botën islame.
“Islamic Art: A Journey of Splendor” në Seul shënon një kapitull të ri në dialogun kulturor ndërmjet botës myslimane dhe Azisë Lindore — duke afruar dy kultura të mëdha përmes artit, historisë dhe trashëgimisë shpirtërore.” / bota-islame.com
